QuaranThings-To-Beyond

Special Projects | 04-25-2021

Nang ianunsyo sa bansa ang Community Quarantine ay nalungkot ang karamihan higit lalo ang Sangguniang Kabataan dahil kasabay nito ang pagpapaliban ng mga ihinandang proyekto na para sana sa mga kapwa kabataan. Dahil rito ay hinikayat ng lokal na gobyerno ang mga SK na mag-isip o lumikha ng proyektong makatutulong sa mga kabataan kahit sa mumunting paraan lamang. Agad namang nagpulong ang SK Malanday at dahil na rin sa kagustuhan nilang makapaglingkod at makapag-bigay saya sa mga residente ng Malanday ay nabuo ang proyektong Quaranthings-To-Do.

Ang QuaranThings-To-Do: Photo Challenge of the Day ay isang proyekto kung saan ang mga residente ng Malanday ay malayang makikiisa kahit na sila ay nasa kani-kanilang tahanan lamang. Napapanahon din dahil sa panahon ng quarantine ay palaging nakasubaybay ang karamihan sa kanilang facebook. Madali lamang din ang pagsali rito kaya naman mula sa 33 na kalahok sa unang episode noong April 16, 2020 ay umabot ito ng higit sa 300 sa huling episode noong April 23, 2020 dahilan upang agad na magkaroon ng mas pinasayang Season 2 na nagsimula noong May 3, 2020 hanggang May 15, 2020. Ang mga premyong ipinamahagi sa mga nanalo sa unang season ay mula sa sariling bulsa ng konseho at nakatutuwa namang sa season 2 ay dinagsa ang Quaranthings-To-Do ng tulong mula sa mga sponsor.

Dahil pa nga sa mainit na pagtanggap at pagtangkilik ng mga ka-barangay sa proyektong ito ay nakarating sa programang Pambansang Almusal ang balita at nabigyan ng pagkakataon ang SK Malanday na maibahagi ito noong May 7, 2020. Nagpasalamat sila sa pagpapa-unlak ni SK Chairman Mark at hinikayat na ipagpatuloy ang gawaing ito na layon ay makatulong at magbigay-saya sa mga taga-Malanday. Kaya naman bilang tugon, noong June 17, 2020 ay sinimulan ang Quaranthings-To-Do: Bulilit Edition kung saan mga mag-aaral naman ng Day Care Malanday ang nabigyan ng gawain at kaunting regalo. Ikinagalak din ito ng mga magulang dahil sa kaunting panahon ay nagkaroon ng mapaglilibangan ang kanilang mga anak.

Sumapit pa nga ang panahon ng kapaskuhan at siyempre ay hindi ito pinalampas ng SK Malanday. Dito, ibinuhos nila ang pamimigay ng premyo dahilan upang umabot ang mga kalahok sa higit 500. Muling naging mainit ang pagtanggap ng mga residente ng Malanday at inulan ng pasasalamat ang konseho. Nakatataba ng puso ang mga papuring natanggap ng konseho kaya naman hindi natapos ito sa taong 2020 dahil nito lamang April 15, 2021 ay sinimulang muli ang Quaranthings-To-Do: Anniversary Special at magpapatuloy itong magbigay-saya hanggang sa Araw ng Kapistahan ng Barangay Malanday.

Dumaranas man ng pandemya ang mundo sa kasalukuyan at nananatili pa rin ang bansa sa Community Quarantine ay nagagalak naman ang SK Malanday na kahit sa mumunting paraan ay nakapagbigay-saya sila sa mga residente ng Malanday bilang saglit na pagtakas sa sitwasyong kinahaharap ng lahat. Bilang ganti, ipinapangako naman ng konseho na hindi rito matatapos ang paglilingkod sa mga mamamayan at sisikapin pang mag-isip ng mga panibagong pakulo na muling magpapasigla sa mga kabarangay.

//SKS Mara Sindac